Bu kliniğe burada henüz yorum yapılmamış. İlk siz yazabilirsiniz.
فهد المطيري
كنت لمدة ٣ سنوات متردد اسوي الزراعة او لا؛ والحمدلله قبل ٤ شهور سويت العملية عند الدكتور سلمان المطيري؛ اللي اشكره شكر جزيل من القلب لانه يستحق الثناء ويستحق الإشادة؛ الدكتور احترافي ومهني بكل ما تعنيه الكلمة، والحمدلله الان كملت ٤ شهور من الزراعة والنتايج لحد الان جميلة جدا وكل من شافني مدحها..
الدكتور سلمان يشرح بالتفصيل وما يقصر ع اي سؤال والمتابعة ما بعد العملية
واهم شي تتوكل على الله وتلتزم بالتعليمات العلاجية المصاحبة للعملية؛ لان الزراعة جزء من العلاج ، لازم الالتزام بالبخاخ المينوكسوديل والعلاجات الاخرى حسب وصف الدكتور لك
واشكر كل الفريق اللي مع الدكتور ما قصروا ابدا وتجربتي الحمدلله جميلة
بصراحة تجربة أكثر من رائعة .. الدكتورة عبير العراوي قمة في الاحترافية و الاخلاق واللطافة اهتمت بأدق التفاصيل وكانت صريحة و واضحة واعطتني كل التفاصيل الي احتاجها و كانت صريحة معي من البداية ، وخلال كل المراحل كنت حاسة بالراحة .. التنسيق متعاون وسريع بالمتابعة ، والفريق الطبي كله ممتاز ومتعاون و تعاملهم راقٍ جدًا .. أشكرهم جميعًا على الاهتمام والاحترافية العالية ، وأنصح بالتعامل معهم بكل ثقة .. اكملت ١٢ يوم من العملية و بإذن الله كلي أمل الشهور القادمة اشوف نتيجة مرضية ..
امس اجريت زراعة للرأس عند الدكتور ريان القفاري
بكل صراحة وأمانة الدكتور شاطر وفاهم شغلة بأتقان وفن رسم لي خط المقدمة بأحترافية تناسب الشكل الطبيعي يقدم لك النصيحة والخطة العلاجية بوضوح
بالنسبة للألم الدكتور نفسه هو اللي قام بتخدير المنطقة وفتح القنوات وما حسيت بأي الم يذكر وخزات خفيفه ما تستدعي القلق ابدا لأنهم يستخدمون اجهزة اشبه بالهزاز لتشتيت الأعصاب .
بالعكس بالنسبة لي ملل الجلوس هو اكثر من الالم نفسه وهذا طبيعي انك تجلس فترة طويلة علشان تطلع بنتيجة مميزة
التواصل مستمر مع الدكتور الى ان اصل للنتيجة المطلوبة ان شاء الله يرد على جميع استفساراتك وهذا المميز بمركز ادمة بشكل عام والدكتور بشكل خاص
الاسعار الان اشوف انها متقاربة بالخارج اما غير المختصين اكيد اسعارهم اقل بكثير والشي اللي للصحة والجمال لا تخاسر المال فيه ابحث عن الأفضل دائما هذي وجهة نظري واللي مايقدر ينتظر لين يقدر ان شاء الله لاتسلم راسك غير مختص بالشغلة اسأل عن الدكتور واطلع على شهاداته ونتايج شغلة وتوكل على الله .
انا طلعت من عندهم مرتاح هذا اليوم الثاني والأمور طيبة لا انتفاخات ولا شي والقادم أفضل بإذن الله
الحين أقدر أنقل تجربتي بعد مرور سنة من زراعة الشعر، والحمد لله راضٍ كل الرضا عن النتيجة.
كانت تجربتي ممتازة من البداية إلى النهاية في مركز أدمة. بداية من عند المنسقة نوال والشكر لها لسرعة تجاوبها واهتمامها بكل التفاصيل ، والشكر كذلك للممرضات اللي كان مع الدكتور عبدالله، كانوا متعاونين وبشوشين طوال العملية.وكانت العملية من أسهل مايكون والألم كان خفيف لا يذكر ،
وأخص بالشكر الدكتور عبدالله البراك من أول يوم جيته للأستشارة كان يجيب على كل الاستفسارات ويشرح لك بدقة خطوات العملية وكان يطمنك أن العملية سهلة . وشهادة لله الدكتور فاهم وش بيسوي ويحرجك بتعامله 🙏 حتى بعد العملية كنت أتواصل معه عبر الواتساب وكان متجاوب ويجيب عن جميع الاستفسارات بكل رحابة صدر، والحمد لله بالنسبة للنتيجة فاقت توقعاتي . والشعر مو مبين أنه مزروع لأن الرسمة توضح أنه الشعر طبيعي .
كانت تجربة الحمدلله ناجحة بكل المقاييس .
أحب أشكر مركز آدمة على التجربة المميزة في زراعة الشعر، وبالأخص الدكتور سلمان المطيري على احترافيته العالية ودقته في العمل. من أول استشارة إلى يوم العملية وهو يشرح كل التفاصيل ويطمني، وفعلاً شغله متقن ونتيجته تبشر بالخير.
وكذلك كل الشكر للمنسقة أماني على تعاملها الراقي واهتمامها المستمر، كانت متعاونة جداً وسريعة في الرد على كل استفساراتي، وسهلت علي كل الإجراءات
سويت زراعة عند الدكتور سلمان المطيري، وتجربتي كانت أكثر من ممتازة. الدكتور محترف وشغله دقيق وما فيه أي ألم ويشرح كل خطوة بكل وضوح. وكل الشكر لمنسقته أماني على تعاملها الراقي ومتابعتها المستمرة قبل وبعد العملية وكانت سبب كبير في سهولة التجربة. والمركز نفسه تعاملهم ممتاز واحترافي من البداية للنهاية. تجربة تستحق الثناء.
التقييم عبارة عن سرد لمراحل الزراعة
التقييم يشمل : الدكتور - منسقة المواعيد - طاقم التمريض
تمت كتابة التقييم بدون اي مجاملة واي احد يقرا التقييم راح يكون في ذمتي اني كتبت كل شي صحيح
الدكتور سلمان المطيري . تعامل راقي وحرص على المريض تاخذ وقتك معه بالعيادة قبل واثناء وبعد العملية .. يجاوب على اي استفسار حتى على الواتساب خصوصا المريض بعد العملية يكون عنده تخوف اذا طلع دم والدكتور يتجاوب بكل رحابة صدر ، يعطي نصايح بالمناسب لك ولا يقنعك بس على شان تدفع
منسقة المواعيد الاستادة اماني . حريصة جداً في التذكير قبل الموعد كذلك المرونه في تعديل المواعيد حسب ظروف المريض
طاقم التمريض. اثناء العملية ومواعيد الغسيل ، الطاقم محترف ومتمكن
العملية:
قبل العملية موعد مع الدكتور لتحديد نوع الزراعة وعدد البصيلات وطلب تحاليل
بعد التحاليل ترتب لك المنسقة موعد العملية،
يوم العملية الدكتور يسوي البنج ويحدد مكان الاقتطاف ويسوي فتحات مكان زراعة البصيلات واتجاه الشعر، الممرضات هم الي يزرعون الشعر في مكانه
بعد العملية بيوم موعد غسيل شعر
بعد العملية ب١٠ ايام غسيل شعر
وبعدها مواعيد متابعة
الايجابيات:
شرح مفصل عن نوع العملية خلال اول زيارة
وصف الادوية المناسبة
زراعة الشعر بطريقة تكون مقاربه للشعر الطبيعي
عمل مواعيد متابعة من ضمن بكج العملية (موعد بعد ١٠ ايام، شهر، ثلاث شهور، ٦ شهور، ٩ شهور ، ١٢ شهر)
مرونة في المواعيد
السلبيات: بسيطه لا تكاد تذكر
تفاجأت اثناء العملية ان الدكتور يسوي فتحات البصيلات والتمريض هم الي يزرعون وضايقني الموضوع وطلبت الدكتور وجا وشرح لي ان هذا دورهم في كل العمليات وان المهم هو فتح مكان للبصيلات والممرضات تم تدريبهم على وضع البصيلات مكانها
السلبية الثانية ، تفاجأت ان الدكتور عنده عمليتين بنفس الوقت وهذا سبب لي توتر بسيط كنت اعتقد ان الدكتور بيكون معي طول العملية
طبعاً بعدين عرفت ان هذي اشياء طبيعية
الخلاصة،،،
النتيجة مرضية بالنسبة لي صحيح ان الشعر ما يرجع مثل قبل الصلع لكن الفرق واضح جدا جدا وماندمت على اني سويت زراعة
انصح بشده في عملية الزراعة خصوصا في ادمه اهتمام عالي ومتابعة لمدة سنة
الدكتور سلمان يبسط الشرح ويخليك تفهم كل شي تسأل عنه وباله وسيع مع المريض
المنسقة اماني متعاونة جداً وحريصة في ترتيب المواعيد (قبل الموعد بيوم ترسل رسالة تأكيد حضور المريض للموعد)
انتهى
تجربتي في زراعة الشعر بالمركز كانت رائعة جداً، بداية من حجز الموعد مع المنسقة المتميزة هدى التي تشكر على تواصلها الفعال واحترافيتها المهنية ثم الكشفية مع الدكتور ريان القفاري اللي اخترته بعد ان رأيت تجربة أحد الاصدقاء معه والحقيقة أن الدكتور متميز وجميع الطاقم الي معه على مستوى عالي من الدقة والاحترافية.
وكذلك أن جميع العاملين في المركز قمة بالذوق والاحترام.
تحياتي وبالتوفيق للجميع
